Eit utval med det spennande namnet Framtidsutvalet, oppnemnt av Språkrådet, har i november 2018 lagt fram rapporten Språk i Norge – kultur og infrastruktur. Rapporten gjer opp status for norsk språkpolitikk ti år etter Stortingsmelding nr. 35 (2007/2008), Mål og meining. Ein heilskapleg norsk språkpolitikk, og tilrår målretta arbeid på mange innsatsområde for å sikre at norsk språk, nasjonale minoritetsspråk og norsk teiknspråk skal stå sterkt i framtida òg. Situasjonen no er prega av fleirspråklegheit, mediespråk i endring, språkteknologi i frammarsj, stadig meir bruk av engelsk i utdanning og arbeidsliv, bokmålsdominans over nynorsk, dialektbruk på alle arenaer, nasjonale minoritetsspråk under press, og mange nye minoritetsspråk som følgje av innvandring.